المسرحية

( الفصل الأول ) (شيطان يجلس يشرب شيشية و ملاك معدي ) م: ازيك ياشوشو ش: اهلا يا ميمو ... اتفضل م: لا معلش انا رايح الكنيسة أصل فيه اجتماع إعدادي دلوقتي ش: ياراجل ... بجد ؟؟.... طب كويس ... ياللا بقي شوف شغلك عاوزين شباب إعدادي كلهم يبقوا بجناحات زيك كده (يمشي الملاك بعيد شوية و يعود الشيطان للشيشة وهو يدندن ... ثم يرجع الملاك للشيطان مرة اخري وينظر له باستغراب ) ش: فيه حاجه يا ميمو ؟ رجعت ليه ؟ لحسن يكون نفسك ف الشيشة والا حاجه م: لا طبعا ... انا بس مستغربك قوي ش: ليه ياعم انا جيت جنبك م : ماهو ده إللي مخليني مستغربك ... كل مرة كنت بتعرف فيها إني رايح الكنيسة ... كنت بتجري علي طول وتحاول تمنع الولاد إنهم يروحوا وتعطلهم بأي شكل .. ليه بقي المرة دي عادي كده ... كأنه مش فارق معاك ؟ ش: لالالالالا إلا الكنيسة ... إيه بس الكلام ده ... عاوزني أمنع الولاد إنهم يروحوا بيت رابونا ... اخص عليك ياميمو ... إنت فاكرني إيه ؟ شيطان م: أه إنت شيطان ... امال إنت فاكر نفسك إيه؟ ش: اه صحيح ... أنا نسيت ... ولا مؤاخذه أصل زي ما انت شايف انا بقالي فترة خالي شغل مابعملشي حاجه او بصراحه ... مش محتاج أعمل حاجه م: إزاي بقي ؟ أمال مين سبب الشر و الفساد اللي في العالم ده؟ ش: انت دايما ظالمني كده ... دايما بتفتري عليا ... يعني مش عاجبك حالي وانا بشتغل ولا وانا ساكت ... أعمل ايه بس عشان أرضيك ؟؟ هاه ... م: ليه حاسس إنك بتدبر حاجه .... قعدتك دي مش طبيعية ... فيه إيه ياشوشو ... ناوي علي إيه ش (يقعد بأنتخه): أنا شخصيا مش ناوي علي حاجه ... انا اعتزلت من زمان .. وسايب البشر يعملوا كل اللي نفسهم فيه من غير ما أتدخل أنا م(مستغربا) : إزاي ؟؟ دا إنت سبب كل البلاوي إللي... داإنت .... (يقاطعه) شوشو: ايه ده ايه ده ... طب ليه الغلط ده بس ... م : انا مبغلطش وانت عارف .... اتكلم صح مرة واحده وقول لي ناوي علي ايه ؟ ش(يجلس ) : طب تعال طب أقعد جنبي هنا و انا أفهمك (يرفض ميمو الجلوس ويبتسم شوشو) ش: ماشي ... انا هاقولك ... عشان إنت حبيبي بس ... شوف ياسيدي (ويقف ويبص للملاك) والا ليه أحكيلك تعال معايا و أنا أخليك تتفرج بنفسك م: هانروح فين ش: مش إنت كنت رايح اجتماع إعدادي ... أنا هاجي معاك م : شفت ... شفت .. عشان تعرف إنك كداب وأبو الكداب كمان ... عاوز تبوظ الاجتماع ش: أبوظ مين بس إنت التاني ... انا مش هاتكلم أصلا وحياة ابني شيطون الصغنن ... طب بص بلاش نروح .. من مكاننا هنا ... هاوريهوملك اهه م: ماشي ... بس عارف لو حاولت تبوظ الاجتماع ..... ش: هاتعمل ايه يعني .... هتسامحني ... ما انا عارفكم يابتوع الكنايس غلابة ... بص كده (علي شاشة العرض) (يظهر أولاد واقفين بيتكلموا وهم بيهزروا مع بعض هزار رخم فيه ضرب ويقع واحد فيتريقوا عليه ) ش: شفت ... شفت هم بيعملوا ايه ؟ ومن غير ما انا اجي ناحيتهم اصلا م : لا طبعا ده كله من تاثيرك انت ... ش : تأثير .... برافو عليك .... إنت كده جبت المفيد .... عاوز تعرف مين إللي بيقدر يأثر ... روح شوف دول (يشاور علي الشباب) عايشين إزاي بره الكنيسة م : قصدك ايه يعني .. ش : هو فيه ايه ؟ إنت فاكرني هساعدك عشان تخليهم يبقوا كويسين ... لا .. لحد هنا و استوب .. انا بكلمك بس عشان انت صوعبت عليا ... ياللا ياشاطر روح شوف شغلك انت ... هاف ا نيس داي (ويبص للناس) يعني نهارك ابيض انشاء الله لاتكونوا مش فاهمين (يخرج وياخد الشيشة معاه) (ويقف الملاك محتار شوية ويلف في المسرح ) ويظهر ملاك تاني م1: ايه ياميمو بتعمل ايه ؟ وليه مارحتش الكنيسة لحد دلوقتي؟ م : محتار قوي ... كنت لسه بتكلم مع شوشو ولخبطني م1: ماهو طبيعي يلخبطك مش شيطان ... بس أنت ايه اللي خلاك تتكلم معاه اصلا .. انت عارف اننا ممنوعين نتكلم معاه خالص عشان ممكن يجرجرنا لحاجات تانية م: احنا كنا بنتكلم عن شباب اعدادي واللي حاصل فيهم ... وهو قال لي كلمة غريبة قوي .... م1: قالك ايه ؟ م : قال لي شوف مين بيأثر فيهم ... م1: فعلا كلمة غريبة قوي ... بس إنت عارف سن اعدادي بيتاثر بالحاجات اللي حواليه بسرعه .. ويغير رايه بسرعه برضه ... يعني ممكن يتأثر بالشلة شوية وبعدين ينساهم و يرجع يتاثر بالنجوم في اي مجال و برضه يرجع ينساهم .. مش جديدة يعني عليهم ... ما انت عارفهم م: شكلك شايل منهم قوي يا مامو .. م1: يابني شباب إعدادي دول ... آخ خ خ ... انا اللي مانعني عنهم اني ملاك ... ماعلينا نرجع لموضوعنا م: انت معاك حق ... بس زي ما انت بتقول الحاجات دي تاثيرها مؤقت ... ايه بقي الحاجه اللي بتاثر علي طول ؟ م1: مش عارف ... ماتيجي نفكر شوية (يلفوا هم الاتنين شوية ) م1: بس عرفتها ... السجاير م: مامو ... بقولك ايه ... فكر عدل ... سجاير ايه اللي ف اعدادي م1: اه صحيح ... هم بيحبوا يجربوا بس ... طب ايه طب ايه ؟؟ اه ... ممكن السجاير م: عارف يا مامو لو مسكتش .. هانسي اني ملاك وهاوريك ... ياتفكر عدل ياتسكت م1 (يفكر) : بس لقيتها ... م (يقاطعه ) : هاتقولي السجاير تاني ... ها ها ... م1: لا لا بجد اسمعني ... ايه اكتر حد بيقعد مع الولاد .. اكتر من اصحابه م: السجاير م1: ماتبطل سجاير بقي ورد ... ايه ؟ م: مين يعني تقصد ؟؟ اهله ؟ م1: بالظبط ... شاطر ياميمو م: ايوة .. بس ازاي اهله هايكون ليهم تاثير سئ علي اي ولد او بنت ؟ دا الاهالي دايما عاوزين مصلحة عيالهم (يدخل الشيطان) ش: مصلحة ... انا سامع كلمة مصلحة ... مين عاوز مصلحة م1 : انت بتتجسس علينا ياشوشو .. انت مش هاتبطل الداء اللي فيك ده ؟ ش : انا بس حبيت احط التاتش بتاعي ياشباب الملايكة ... واهو اكسب فيكم ثواب م1: نعم ؟؟ ازاي بقي ش1: هاقولكم حاجه تعالوا بدل مانقف نتخانق كده نروح للاهالي بيوتها ونشوفهم هم بيعملوا ايه مع ولادهم اللي ف اعدادي ... خللوا بالكم انتوا قلتوا انهم بيحبوهم (م1 وم) في صوت واحد : طبعاً ش: خلاص ... شوفوا انتوا بقي بيعملوا ايه معاهم عشان تفهموا كلمة تاثير اللي انا قلت لها دي ماشية ازاي . م : طب واحنا هانروح بيت مين يعني؟ ش : اختاروا انتوا اي بيت يكون عنده حد في اعدادي ... وبلاش بيت واحد عشان ماتقولوش اني بفتري عليهم ... اختاروا بيتين وشوفوا ... م1: شكلك واثق من نفسك قوي ش : لا .. صراحه انا واثق في الاهالي .. ماعلينا خلونا نشوف م : طب نختار بيت مين .. ش : شوفوا انتوا براحتكم ... انا ماليش دعوة م1: تعال نختار (تظهر صور ميكي ) ميكي مين ياعم ده هناك في امريكا البلد إحنا عاوزين حد من هنا م : خلاص بيت ...مدحت ...... و كمان بيت مراد وفاتن... ايه رايك ؟ ش : ماشي .. وف كل بيت هانشوف المعني الحقيقي للتأثير م1: ناوي علي ايه ياشوشو ش: انا نيتي سليمة وهاوريكم اللي اقصده في حاجه بسيطة ... ممم الكدب مثلا م: شوشو .. انت عارف ان احنا معندناش حاجه اسمها خطية كبيرة وخطية صغيرة .... كلها خطايا عند ربنا .. متألفش ... الكدب مش حاجه صغيرة ش: طب ياعم ماتزقش .... أنا عارف وحافظ كلامكم .. بس خلونا نبتدي بيه ونشوف هيجرجر ايه وراه م: ماشي ياشوشو ... ياللا بينا (يخرجوا) الفصل الثاني تفتح الستارة علي قهوة ترابيزة وشوية كراسي ويجلس عليها ابرام ونور وشاهين قاعد بيتفرج ويلعب ف الموبايل أ : ياسلام سلم .... أهو كده خلاص يامعلم ماتتعبش نفسك ... الدور ده بتاعي ن : لا ياحدق لسه بدري ... اصبر وهاتشوف أ: متحاوش ياسطي ... قلت لك خلاص (ويرمي ورقة كوتشينة ) (نور يبص للورق اللي معاه ويبص ع الترابيزة) ن: انت هاتستعبط يا ابرام ازاي يبقي معاك 4 ولاد وانا معايا واحد كمان ؟ أ: وأنا مالي ياخويا انت اللي كداب ونصاب كمان (يقوم ت متنرفز ويمسك ف خناق ابرام و يحاول شاهين يفض الخناقة) هـ : فيه ايه يارجالة ... مايصحش كده فرجتوا الناس علينا ... ن: الواد ده غشاش ف اللعب أ : انا ؟؟ بس ماتقولش غشاش ... دي اسمها فهلوة ... حداءة ... كده يعني هـ : اهدي يانور ... ماتكبرش الموضوع .... ده حتة دور كوتشينة يعني ن(يجلس وهو متضايق) : انا مش لاعب معاك تاني علي فكره عشان انت غشاش وكداب (يرن موبايل نور فيطلعه ويبص فيه ) هـ : ايه مش هاترد ؟؟ ن: دي الراس الكبيرة ... ولو رديت مش هاخلص هـ : مين الراس الكبيرة دي ؟؟.... امك ؟؟ ن: ايوة هي أ : ياعم رد ... انت هتخاف ليه هي موتة والا اكتر ن: ما انا لازم ارد ... مش راضية تبطل زن ... ياريتني ماعلمتها تمسك الموبايل من يوم مامسكته وهي ورايا ف كل حته (يرد نور) : الووو... ايوة ياست الكل .. ازيك ت: انت فين يامنيل ؟؟ انا مش قلت لك ماتتاخرش عن الساعه 9 ؟ اهي داخلة علي 10 اهيه وانت ماجيتش ن: معلش ياماما ... اصل .. اصل ... المذاكرة خدت وقت طويل وفيه حاجات مكنتش فاهمها ابرام بيفهمهالي ت: بالذمة ايه ؟؟.. انت ياواد مش هاتبطل كدب ؟ امال ايه صوت المزيكا اللي انا سامعاه ده ... شوف يانور هم 5 دقايق والاقيك قدامي هنا .. احسن هاقول ابوك وانت عارف هو هايعمل ايه لما يعرف ن: طب ياماما لو رجع قبلي قولي له انا بذاكر مع صحابي يعني ... استري عليا ياست الكل ياغالية انتي واحنا هانخلص الواجب هاجي علي طول (تقفل السكة ف وشه ونور يبص ف التليفون ويرجع يكمل كلام) ن: ماشي ياحبيبتي ... عينيا .. مش هتاخر ... سلام أ : ايه ياد يابتاع الضمير والاخلاق ؟؟ بذاكر مع صحابي .. هاهاهاها ن: مالكش دعوة بيا يا ابرام ... وبعدين دي مش كدبة ... أنا حر ...وبعدين ماهي ف الاخر رضيت عليا ومش زعلانة فخلاص بقي هـ : انت نصاب كبير قوي يا ابو النور انت (يخبطه علي كتفه) أ : ماهو أصل الكدب لو في مصلحتك مايبقاش كويس وحلو ... معلش معلش ... كلنا كده ن : بصوا انا ماليش مزاج اتخانق تاني .. انا ماشي (يخرج نور) أ : شوف الواد اللي كان عامل نفسه قديس .. وماتكدبش و ماتغشش .. ياباي هـ : سيبك منه ... هييه .. ايه النظام النهارده؟ أ: نظام ايه ؟؟ انا لازم امشي انا كمان .. ابويا حالف لو اتاخرت عن 10 هيبيتني ع الرصيف وانت عارفه .. هـ : أه كلمته لا يمكن تنزل الأرض أبداً .. طب ياللا بينا (وهم قايمين يبصوا بعيد ويشوفوا فادي) أ: ايه ده ؟؟ مين اللي هناك ده ؟؟ هـ : معقولة ؟ ده عمو فادي بنفسه ؟ ايه اللي جايبه هنا ؟؟ يلعب دورين دومنه والا يقابل المزة بتاعته أ: اتلم يا شاهين عيب مايصحش هـ : ياعم انا بهزر .. ده جاي علينا ف : اهلا يا ابرام أهلا يا شاهين .. كنت متاكد أني هالاقيكم هنا أ: اهلا ياعمو .. خير ف: انا بقالي فترة مابشوفكمش ف الاجتماع ووحشتوني .. فقلت اطمن عليكم .. انتوا كويسين هـ : اه احنا تمام بس انت عارف بقي الدروس و المذاكرة وكده ف: طب هو الاجتماع هايمنعكم من كده ؟ دي هي ساعه ف الاسبوع .. بلاش حجج ... عاوز اشوفكم .. ماشي؟ أ: انشاء الله ياعمو .. انشاء الله ف : طب ماتقعدوا اعزمكم علي حاجه هـ : معلش كان نفسنا صدقني .. بس احنا اتاخرنا ولازم نمشي ف: طب انتوا بتقابلوا نادر ونور ؟ أ: لا مش كتير ... سلام ياعمو .. سلام ف: طب انا كنت عاوز اقول ... (يسيبوه لوحده ويمشوا) ف(يكلم نفسه) : طب اعمل ايه مع الولاد دول ؟؟ اه احسن حاجه احاول اوصل لاهاليهم ... انا معايا نمر حد فيهم (يدور ف الموبايل) لا مافيش ولا نمرة .. طب ايه ؟؟ (يدخل نادر ويشوف فادي ويحاول يطنشه لكن فادي يلمحه) ف: نادر .. ازيك واحشني ياراجل (ياخده بالحضن ونادر يلطم من وراه) ر: وانت كمان صدقني ياعمو بس انت عارف بقي .. ف: عارف عارف ... الدروس و المذاكرة ...ما انا سمعت الكلام ده من ابرام وشاهين قبلك ر: انت قابلتهم ؟؟ ف: ايوة كانوا هنا ولسه ماشيين .. الا صحيح معاك نمرة ابو ابرام وابو شاهين ؟ ر: عاوز النمر ليه ؟ هم عملوا حاجه فهاتشتكيهم؟ ف: لا ياسيدي ... انا كنت عاوز الناس الكبيرة ف حاجه تاني .. اديني النمرة ر: معلش ياعمو... أنا لسه مفرمت الجهاز وكل النمر طارت من عليه .. وبعدين انا اساسا مكنش معايا نمرهم .. هو انا هاشيل نمرهم ليه هاصاحبهم؟ دا انا بكلم الولاد بالعافيه هاكلم اهاليهم ليه بقي ؟ ف: طب خلاص مافيش مشكلة ... انا هاتصرف... هاشوفك الجمعة الجاية ف الاجتماع انشاء الله .. ماشي ؟ ر: اه .. طبعا طبعا .. ربنا يسهل .. دا انا اجي مخصوص عشان اشوفك ياعمو ف : ماشي ياعم الاونطجي ... سلام (يسلم عليه ويخرج فادي ويجلس نادر ويمسك الموبايل ويتصل بابرام) ر: أيوة يالا يا ابرام انتوا فين انا ف القهوة؟ ... مشيتوا ليه يا اندال ؟ اه ه ه عمو فادي .. ماهو قفشني انا ... ماشي ماشي .. انا هاوريكم ... ع العموم ياسطي هو كان عاوز نمرة ابوك ... وانا .. (يضحك) ماتقلقش انا قلت له انها مش معايا ... بس انت عارف .. النمرة معايا ... ايه اديهاله ؟؟ انا شايفه هناك اهه .. عمو فادي عمو ... (يضحك) طب خلاص ياعم ماتقلقش مش هاديهاله .. بس خللي بالك .. انا كده كدبت عشان خاطرك وده مش ببلاش ياسطي... كدبة صغيرة؟؟ ماشي .. اعديهالك .. بس ليا عندك قصاد الكدبة الصغيرة كانزاية صغيرة برضه.. المهم قول لي .. انتوا روحتوا ؟؟طب خلاص بقي .. بكره نتقابل نتفرج ع الماتش مع بعض ... لا مش هتاخر بكره ياللا انا كمان هامشي قبل ما يطب عليا عمو فادي تاني و انا مش ناقصه وبعدين انا كمان اتاخرت و ميعاد رفع الشبشب قرب ... سلام (يقعد شوية يلعب ف الموبايل وبعدين يمشي ) (يدخل مدحت ومراد ويقعدوا) ح: بس ياعم مراد .. واول ماعرفت ان البضاعه سعرها هايزيد رحت مكمرها كلها ف المخزن د: واللي ييجي يسالك عليها ... تقوله وحياتك لو لقيت منها ابقي هات لي انا كمان معاك صح (يضحكوا مع بعض) ح: طبعا وبحلفه بالغاليين كمان ... أمال ايه د: جدع ياعم مدحت ... اهي دي الشطارة والا بلاش .. ح: أمال ياعم ... ماهي التجارة شطارة وهو الواحد بيعمل ده كله ويتعب ويشقي عشان مين ؟ ماهو عشان خاطر الولاد د: طب بمناسبة الولاد ... هم عاملين ايه في المذاكرة؟ ح : ولا اعرف عنهم اي حاجه ... كل اللي اعرفه اني كل اول شهر هات يابابا هات يابابا مصاريف الدروس وبس أي حاجه تاني .. امهم هي اللي متولياها د : وانا كمان زيك بالظبط ... بس الجماعة عندي اليومين دول مشغلاه لي اسطوانة العيال كبرت .. خللي بالك منهم .. ح: ياعم مراد .. ياعم مراد .. انت مش سايب لهم مصروف البيت وكل حاجتهم مقضية؟ خلاص .. هايعوزوا ايه بقي اكتر من كده؟ د : ما انا بقول لها لو حد تعبك منهم قولي لي وانا اكسر لك دماغه .. لكن شوفهم واقعد معاهم .. ماليش انا ف السكة دي ح : وحتي لو ليك ... هاتجيب وقت منين يعني .. وبعدين ارجع اقولك تاني ...هو التعب اللي بنتعبه ده لمين ؟ ....ماهو كله ليهم د: علي رايك ....(الموبايل يرن ) استني دي الجماعة ... خير؟؟ د: الو ... ايوة ياستي ... خير ت: الواد ابرام مرجعش لغاية دلوقتي ... وبكلمه مبيردش عليا .. تعال بقي شوف ابنك واتصرف معاه د: نهاره مش فايت ... وانتي ماتعرفيش هو فين ؟ ت: اه كان عند شاهين بيذاكر معاه هو ونور د: أنا أبو شاهين معايا اهه هساله (يسال مدحت) هو الواد ابرام عندكوا ف البيت لحد دلوقتي ؟ ح : عندنا لا شاهين اللي عندكم من بدري هو قال لي هايروح يذاكر مع نور وابرام عندكم ف البيت د : العيال بتكدب وتسرح بينا يا مدحت (ويكمل كلام ف التليفون) انا هاعرفه شغله لما اروح ابنك بيكدب ياست هانم مش عند شاهين والا حاجه ... وانتي قاعده نايمة علي نفسك ومصدقة كل حاجه بيقولهالك ت : وانا اعمل ايه ياخويا .. ما انا قلت لك قبل كده مش قادرة عليه والواد كبر وانت ولا هنا د : مش وقته الكلام ده ... لما اروح نبقي نتفاهم ... ولما يرجع بسلامته اوعي تخليه ينام لحد ما ارجع ح: الولاد بيسرحوا بينا يا مراد .. ماشي ياشاهين ... هو الواد نور السبب هو اللي بيعلمهم الصياعه دي د : دي اخرة تربيتنا فيهم يكدبوا علينا كده (يدخل فادي) ف: مساء الخير ... ازي حضراتكم ح: اهلا يا استاذ فادي ... جيت ف وقتك .. اقعد (يجلس فادي) د: بقي يرضيك يعني يا استاذ فادي العيال يكدبوا ويصيعوا مع بعض كده ؟ ف: لا طبعا مايرضنيش ...بس ح: بس ايه ... انتوا لازم ف الكنيسة توعظوهم كويس عن الكدب والامانة .. دا جيل صعب يا استاذ فادي خللي بالك منهم شوية الله يخليك ف: أنا مع حضرتك .. بس الكنيسة مش هاتعرف تعمل حاجه لوحدها د: يعني ايه بقي ؟؟ دا كلام ربنا ... لازم يسمعوه ... هو فيه حاجه تاني تتقال جنب كلام ربنا ؟ ف: ايوة حضرتك ... انهم يشوفوا اللي بيسمعوه ف الكنيسه في البيت ... يعني يعيشوا الكنيسة ف البيت .. ح: قصدك ايه بقي انشاء الله ؟؟ هانعمل لهم قداس و اجتماعات وكده ؟ ف: لا يا استاذ مدحت مش قصدي طبعا ... انا قصدي في تصرفاتنا معاهم وعلاقتنا بيهم د : بقولك ايه ... احنا بنربي عيالنا احسن تربية ومش حارمينهم من حاجه علي اد امكانياتنا .. ماترجعش ترصي لي الرصه اللي مالهش لازمة دي .. ح: ايوة احنا لينا دور بنعمله ... وانت ليك دور اعمله كويس بقي الله يخليك د: مش عاوزين العيال تضيع ف : ايوة يا جماعة .. بس الولاد محتاجين ... (يقاطعه مدحت ) : احنا هانقعد نتكلم و مش عارفين هم فين .. خلونا ندور عليهم الاول وبعدين نبقي نقعد نسمعك (يقوموا يخرجوا ويظهر الملاكين و الشيطان) ش: ها عملت ايه انا بقي ؟؟ شفتوا انا قلت لكم ... هم قايمين بالواجب وزيادة م: ماتعملش نفسك برئ ... انت اللي بتخليهم يعملوا كده ش: دايما ظالمني ... بس ماشي خليني معاكم لحد الاخر تعالوا بقي نكمل ونشوف جوه بيوتهم هايعملوا ايه م1: ماشي ياشوشو .. ولو اني بدات افهم انت عاوز توصل لايه بس خليني معاك الفصل الثالث (يجلس فادي يقرأ في الكتاب ويدخل أبرام جري) أ: عمو فادي ... الحقني .. حوش عني ياعمو فادي ف: فيه إيه يا ابرم مالك (يستخبي ابرام وراه وتدخل أم ابرام وهي ماسكة الشبشب) ت: متحاولشي ... مش هاتفلت مني ... هاجيبك يعني هاجيبك (تحاول تضربه بالشبشب فتيجي الضربه في فادي) ف: أي ي ي ... بالراحة يامدام ... علي مهلك شوية .. فهميني فيه ايه؟ ... ايه اللي حصل عشان دا كله ت: جاي تتحامي في الكنيسة يا ابرام ؟؟ .. فاكر إني مش هاطولك ؟ أ : حوش عني ياعمو ... ف (بصوت عالي) : مش كده يامدام ... احنا في الكنيسة .. مايصحش كده ت : بتقول لي أنا مايصحش ؟؟.... أمال تقول له هو ايه الكداب الحرامي ده ف: اتفضلي ارتاحي بس وفهميني ايه اللي حصل ... يمكن اعرف اساعد ....(يبص لأبرام ) روح استناني جوه يا ابرام (ابرام يخرج وهو بيضحك ضحكة لئيمة) ت: ماينفعش كده يا استاذ فادي .... بصراحه انا مش شايفه لازمة لمرواحه الكنيسة ... مافيش حاجه فيه بتتغير .. بالعكس ...وتصرفاته كل يوم اسوأ م اللي قبله ف: فهميني بس ايه اللي حصل ت : كل يوم يقول لي عاوز فلوس ... مرة دروس ومرة كتب ومرة مش عارف ايه .. وكده يعني طلبات مابتنتهيش ... وانا بديله ... والنهاردة اروح أسأل عليه المدرس يقول لي ابنك مش عندي اصلا يامدام في الدرس ... ده جه مرة واحده بس .. بعدها مشفتش وشه . ف : ياخبر ابيض ... ازاي يعمل كده ... لا لا مايصحش كده خالص طبعا ت: آه ... واللي كايدني زيادة ... اجي اكلمه يقوم ببجاحته يرد عليا ويقول لي وايه يعني ... ما انتي الللي مقرطاها عليا وأنا عاوز اروشن مع صحابي واتبسط ف: لا طبعا .. ماينفعشي الكلام ده خالص .. ماشي يتبسط بس مش بالكدب والسرقة ت : اسم الله عليك ... ماهوده اللي انا قلتهوله ... يقوم بكل بجاحه يرد عليا ويقول لي ما انا شفتك بتنخسري من فلوس ابويا اشمعني انا يعني ف: لالالالا ... ده كده زودها قوي كمان بيتبلا عليكي ؟... سيبهولي وانا هاعرف اتصرف معاه ت (تتلخبط في الكلام) : لا يا أخ فادي .... ماهو ... ماهو ... ف: ماهو ايه حضرتك ؟؟ ت : وهو انا بعمل ده كله عشان مين ؟ ...ماهو عشانهم طبعا ... يعني انا باخد الفلوس دي اعمل بيها حاجه لنفسي دا انا بقي لي سنتين ماجبتليش هدمة جديدة ... ف: قصدك ايه يامدام ؟ ت: ما انت عارف ابوهم ... ايده ماسكة حبتين ... وانا لازم اتصرف ... اه انا عيالي مش اقل من عيال اختي ولازم يعيشوا في مستوي كويس ف: يعني حضرتك دلوقتي عاوزاني اقول لابرام اللي انت بتعمله غلط لكن اللي والدتك بتعمله صح ؟؟ طب ازاي؟ ت تبص له و ماتردش ف: ماينفعشي يامدام نطلب من الولاد يكونوا كويسين في تصرفاتهم واحنا مش بنديهم القدوة الصحيحة ت : بقولك ايه ... انا مش قاعده هنا عشان توعظني ... انا مابعملشي حاجه غلط ... هاتتكلم معاه والا لا؟ احسن صدقني لوماتعدل ما انا جايباه الكنيسة دي تاني ف: خلاص يامدام ...انا هاتكلم معاه ... وربنا يعمل اللي فيه الخير ت: أما نشوف (تخرج) ف(يكلم نفسه): طب انا هاقول لابرام ايه دلوقتي ؟ امك غلطانة بس اسمع كلامها؟ ايه ياربي الموقف الصعب ده (يقعد شوية ... ويدخل ابرام من وراه بيتسحب) أ : عمو فادي ... هي الحاجه مشيت ؟ ف : عيب يا ابرام تقول علي والدتك كده ... تعال اقعد (يقعد ابرام وهو قرفان) أ: لو هاتقعد توعظني .. مالوش لازمه ... أنا حافظ كل الكلام اللي انت هاتقوله ف: مادمت عارفه ... ليه بتعمل كده ؟ أ: ياعم كبر ... ما كل الولاد بيعملوا كده .... أنا غلطتي بس اني اتقفشت ف : ابرام ... (يسمع اصوات جاية) ... بص فيه صوت ناس جايين فتعال ندخل نقعد جوه نتكلم شوية .. وصدقني مش هاوعظك (يخرج فادي ووراه ابرام يتفطط) (يظهر شوشو ومعاه الملاكين ) ش: وسمعني احلا سلام للقدوة والتأثير ..... تن تاللالالالا تن تن م: شوشو .... ممكن تسكت ؟ .... انت عارف كويس ان انت اللي ورا كل البلاوي اللي بتحصل دي ش: يابني دور لك علي شماعة تانية غيري ... هم مش محتاجين اني افكر لهم .. دول شغالين لوحدهم م1: انت اللي بتزرع جواهم الكدب والسرقة وكل حاجه شريرة ش: اهو ده اللي انتوا فالحين فيه ياملايكة .... تسيبوا المشكلة الاساسية وتمسكوا في الحاجات الفرعية م: قصدك ايه بقي ؟ ش: تاني ؟ عاوزني اساعدك تاني ؟ لا ياعم ... روحوا بقي شوفوا شغلكم شوية انا رايحه اصيف في شرم شوية .. باي (يخرج شوشو) م : شفت شوشو وعمايله ؟ م1: طب انت فهمت حاجه منه لما بيقول ان احنا سايبين المشكلة الرئيسية وماسكين في حاجات فرعية ؟ م : يا مامو ده ابليس .. اجدع واحد يشتت ويلخبط .... رئيسية ايه وفرعية ايه بس م1: لا المرة دي هو اتكلم صح ... احنا بنبص علي الكدب والسرقة و الغش علي انهم خطايا كبيرة وناسيين ان مصدر الخطايا دي القلب ... فلو القلب طاهر مش هايحب يعمل الخطايا دي م: طب وايه الجديد ف اللي انت قلته ؟ ونرجع تاني نقول هو ده عمل ابليس انه بيبعد الناس عن ربنا م1: طب وازاي ولاد في سن اعدادي يعرفوا ربنا وهم مش شايفينه ف اللي حواليهم اللي بيكلموهم عنه؟ م: (يفكر شوية) : يعني انت قصدك تقول ايه؟ م1: بص شباب اعدادي مش صغيرين وفاهمين كل حاجه ... تعال كده اسمعهم وشوف هم محتاجين ايه (يخرجوا) (يدخل نادر ونور وشاهين) ر: يالهوي ياجدعان ..... الواد ابرام ده فقري ن : علي رايك ... حظه زفت هـ : ربنا يسترها بس واهالينا مايعرفوش ... هتلاقينا كلنا في الطراوة ن: هتلاقي ابو وردة شغال علي دماغتنا ماشاء الله ر: لا وايه ... كل الحكم والمواعظ تطلع كأننا أجرمنا وعملنا اللي محدش فيهم بيعمله هـ : يعمل ايه بس ياعم ... عيب عليك ياعم نادر ... الكبار دول ملايكة .. كلهم.... قادة واخوات واهالي ن : ملايكة ... اه ه ... دول ناقصهم جناحات ويطيروا ر: علي رايك ... تشوفهم ف الكنيسة .. كل الكبار ... حكم و مواعظ مافيش بعد كده ... وبراها بقي ... ما اقولكش هـ : وبراها ليه ؟ انت مابتشفهومش في الاجتماعات عاملين ايه ؟ في اجتماع الحد ان حضروه ... كل واحد ماسك الموبايل وبيلعب فيه وسايبين القسيس يوعظ نفسه ن : المهم محدش شايفهم لكن احنا لو اتقفشنا ... نبقي ونبقي ونبقي ر: اه ماهم بيتشطروا علينا احنا ... ما احنا الملطشة بتاعتهم ... اوووف (يقعدوا ساكتين وهم متضايقين ) هـ : زمان عمو فادي ماسك ابرام جوه غسيل ومكوة ر(يشاور): ماتستعجلش علي رزقك ... اهو جالك اللي هايغسلك ويشطفك كمان هـ : اهلا ... دا ابويا ومعاه ابو ابرام ... خير ايه اللي جابهم ن : طب ياللا نخلع قبل مانتقفش (يخرجوا بسرعه ورا بعض) (يدخل الملاكين) م: بس بسيطة هي دي احتياجاتهم م1: شوية اهتمام علي حبة حب م: فكرك هايلاقوه ؟ م1: يارب الاهالي يستوعبوا الدرس من بدري م: تعال نشوف (يدخل مدحت ومراد) ح: وبعدين ياعم مراد هانعمل ايه ويا العيال دي د : احنا نكسر لهم دماغتهم ... ماهي برضه غلطتنا ان احنا سايبينهم لامهاتهم وانت عارف ... الحريم قلبهم رهيف مايعرفوش يشدوا (مدحت يفكر وميردش) د: يعني مثلا هم لو طلعوا مؤدبين زي الواد ميلاد (تظهر صورة ميلاد ع الشاشة) والا شريف (تظهر صورة شريف) هايجرالهم ايه؟ عيال في حالها ومحدش حاسس بيها (مدحت يبص له وميردش برضه) د : فيه ايه ياعم .. سايبني اهاتي لوحدي وقاعد ساكت ليه؟ ح : مش عارف صدقني ايه الحل في الولاد دي ... وخايف يكون الوقت فات علي اننا نصلح في تربيتهم بعد اللي باظ د: ياشيخ ماتقولش كده .. كفالله الشر ... هم كانوا عملوا ايه يعني؟ ح: مش باللي عملوه .. ده باللي بيفكروا فيه ووصلهم لكده يا مدحت ... وانت عارف عود الكبريت الصغير ممكن يعمل حريقة اد ايه د: ما احنا لما كنا اديهم ف السن ياما عملنا لكن الحمدلله اهه (يبوس ايده وش وضهر) حالنا اتعدل وعايشين مظبوطين والحمدلله ح: يعني قصدك ايه؟ د: هي العلقة المتينة اللي هاياخدوها وبعدها يتظبطوا ح: ولو ماتظبطوش ؟ د: الايام هاتظبطهم وتربيهم كمان ... يعني احنا كانوا اهالينا عملوا لنا ايه؟ ح: يعني انت رايك كده؟ د: ايوة طبعا ... ياعم احنا مش فاضيين للكلام الفارغ ده ... سيبك سيبك ... تعال ندخل نسلم علي القسيس جوة عشان يباركنا وبعدين نطلع نشوف اشغالنا ح : ياللا ياسيدي خليني وراك (يدخلوا الكنيسة) (يدخلوا الاولاد الاربعه) ن: عمو عمل ايه معاك يا ابرام أ: ولاحاجه هايعمل ايه يعني ... عمو فادي دا حتة سكره ر: بس استلقي وعدك ياحدء لما ترجع البيت ... ابوك مستحلف لك هـ : وايه يعني ... علقة تفوت ولا حد يموت ... أ : طب كفاية كلام بقي كده وياللا شوفوا لنا خروجة ن : اه ياللا احسن الواحد مخنوق قوي ر: ماشي ... تعالوا هاوديكم مكان جديد انما ايه .. محصلش هـ : ياللا بينا بس بلاش نتاخر الله يخليكم ع الاقل النهارده ر: ماشي .. هي ساعه ونروح ..ياللا (يخرجوا ويدخل الملايكة) م : كاننا بننفخ في قربة مقطوعة.... يعني ايه مافيش امل (يدخل شوشو بسرعه) ش: ولا عمر كمان م: لا فيه ياشوشو .. طول مافيه اهالي بتحب ولادها م1: وولاد بتحب اهاليها فيه امل ش: طب ادوني امارة ع الحب ده م 1: دي حاجه ماتتشافش ... دي تتحس ... هي بس محتاجه شوية توجيه في الاتجاه الصح ش: خليكم كده... احلموا بس ماتزعلوش لو الحلم بقي كابوس ... اسبيكم انا بقي .. اصل الشيشة وحشتني (يخرج) م (يكلم الجمهور): فيه امل ... اوعوا تفقدوا الامل في ولادكم م1(يكلم الجمهور): فيه امل ... اوعوا تفقدوا الامل في اهاليكم (النهاية ) 14